دارميات جميلة

شلونـك.. شلون الدار .. وشلون الأحباب
أذكر جرح بجلاك خبـرني ما طـاب

وينه اليخَيـطْ العين ويفكني منهـا
كل ما تصد للدار يكثر حزنــها

كل ما يجي الليل أذكر وفـاكم
واذكر محاشي الطيب وابجي أبرهاكم

نارك يخايب ماي مومثل نـــاري
اومن يطري بيا الشوك يحترق جاري

لاتهتم على الراح وي همك الراح
والعالي مو بالطول بالصبر ينلاح

يسألني البطران ليش وجهك اصفر
مايدري على المحبوب قلبي تفطر

علمني عالنسيان ارد انسى ضيمـك
وي غيري كَمره اتصير بس حصتي ضيمك

شمـاتي مو شـمات شمـاتي شمات
بالكًًبر ويسألـون حي بعده لو مـات

كَلبي أرد أكَـصه إبموس وبفاس أكَطعه
خلصها بالسختـات مالحك ربعـه

الدهر شل يمناي شل يسرتي البين
جابيش اصبر الروح بيش امسح العين

خـل روحـــك إبعِـز دوم بالك تذلها
ولا تطلب الحاجــات إلاٌ من أهلهــا

كل دكَج أعلى الراس بسج يدنياي
مطكَوكَه باليافوخ ماشوفن احــداي

همي الليالي اتعود واتعاتب أوياك
احجايه للشمات خلاني فركَـاك

انت العطش والماي وانت المشوفـه
ورسمج وحكَ عيناج بالكاس اشوفه

مبخوت أضل للشيب يافلان أذكـرك
أوينكرني نور العين من كون أنكرك

سبحان من خلاك تقسي ابغرامك
جانك اتداوي اجروح رق بكلامك

جاشلي بالخوان والماينفعـــــون
عود أمن اموت أيجون ويا اليشيعون

هاك استكانة جاي أشرب عوافـي
أو دزيته لك مخصوص يامايه صافي

شماتي موشمات شماتي اشرار
بالكَبر ويقولون ياربي بالنـار

يحمل وفى والطيب والرقه كلــها
أوكل مشكله ابهالكون بس يمه حلها

ياعازة الخوان عازتها عــازه
والماوراها صياح وحشه الجنازه

اصغير وخاف اعليك من حضن امك
ابكَلبي واكَول ابعيد جاوين اضمــك

عبالي طيب زاد واعطيتك اعيون
تالي توج النار ويا اليكرهــون

الدنيا ماتسواش لاتصفن إلهـا
عالطيب والمزيون يكثر حملها

أطلب واكَلك صار تامرني أنــته
عمري من أول يوم بسمك رهنته

متعجب المهموم يشرب جكَاره
كَلبي ابكثر مانوح تجويني ناره

بسك ولك يالبين دكَاتك أويـــاي
أدكَني وسط الضيج وتشمت اعداي

اقعد ابتالي الليل وادعي ابصلاتي
ياربي بعد افلان شلي ابحيــاتي

سـلَم ولَو بالعين تكفي الإشــاره
روحي إبتلت بهواك .. سويلي جـاره

لو غبت عني الروح احسبها شده
واحرق ابدمع العين حتى المخده

يالتون تالي الليل سمعني حسك
لولا الكَلت والكَال لعبر وونسك

من كثر حر الضلع أحتركَن هدومي
وتسعين ناقة وجمل ماشالن همومي

جاوبني تدري الوكت بوكَاته سكتاوي
موش أنته نبعة عشق بالحسن متغاوي

منك سمعت الاه كثرت جراحـي
وشبيدي خوية اعليك كَصوا جناحي

عفيه كَلب مَيليـن من يسمع إبجـاي
لو من صخر هم جـان لان وغده ماي

القلب كَال أحاه ! كَتله وجعــــتين
منهو الاجى أوعزاك من طكَك البين

ريته اليطيح ابضيج كون اخوته وياه
اوكل مايكَول احاه كلها اتلـــكَاه

الدهر بس وياي راكب إحصانـه
ويكَـلي وين إتروح جدامك آنـه




حبيبيبكم مصطفى العراقي

ثانك يوووووووووووووووووووووووووووووووووووووو

مشكورين وتعيشون عمر النسر

مشكووووووووووووووووووووووووووووووور