:bounce: تدري انه من اشتاك ارسلك دموع .... وانت بصلافة عين ماتقبل تموع
ليلي يمر سهران اتمنه ملكاك .... ومعارك ويه الروح ماترضه تنساك
غلطة وتريد تصير حجة وردتها .... لو انت طيب الذات جان غفرتها
كلما أكول انساك ارجع واحبك .... مثل الزرع والماي كلبي ويه كلبك
لو ردت عني تروح خليلي صبرين .... واحد يصبر الروح والثاني للعين
اتمنه روحي شموع وتحظر بعيدك .... وتكتب على الكيك أحبك وأريدك
ارد أنشد أهل الشوك ومتاني توضيح .... ليش الاحنان بساع دمعتهم تطيح
من دمي أريد اسكيه لولفي وأشربه .... ولو جاع أكص الكلب وأشوي اليعجبه
هاك أخذ كلبي وياك يلماشي لهواي....كله انزرف بجفاك وبوصلك دواي
كل يوم أكول اليوم باجر يمرون .... ومن كثر دمعي السال ماظلت عيون
بأخر نفس مخنوك وأتمنه اشوفك .... واعذرني بس الموت يجبرني أعوفك
هاي البداية وهيج التالي شلون .... رايد سند ياناس ادعولي تهون
خليني يمك حطب من تبرد أشعل نار.... وبالصيف قالب ثلج لو صار مايك حار
كل لحظة أفكر بيك كل ساعة كل يوم .... حته من أغمض العين تطلعلي بالنوم
صوبه علاء الدين كلبي أنا بفركاك.... يمته تجي ياحلو نفط الكلب ملكاك
هذا انت يالمحبوب يابعد روحي .... مجروح وبملكاك هادت جروحي
أسأل عليك الروح مدري شتكلي .... مدري انت نص الروح مدري انت كلي
مل مني حتى الليل والكمر شاهد .... بس بيك أفكر دوم للفجر كاعد
دمك وسط هالروح ومكحل أيدي .... مثل العسل والله يمشي بوريدي
روحي شكثر تهواك وشكد تهم بيك .... سعفه ويهزهه الريح من يمر طاريك
كون الكلب بي باب ينفك تشوفه .... لو شفت غيرك بي حقك تعوفه
ردت انشد العشاك والكلبه مجروح .... الجسد هم يعيش لو عافته الروح
أبجي وأذب حسرات عالفاركوني ....مدري التهوا بالغير مدري نسوني
ياخلي لو صديت كلبي يريدك .... موت وحياة الروح ياخلي بيدك
يمكن أريد أنساك وأكول أعوفك.... وكل الحجي أنساه يوم الاشوفك
ريتك تحس الصار وتشوف الجروح.... جرحي انا مو بضماد تلفه ويروح
شفتك حلم بالليل وهزهزني رسمك .... وظل كلبي يرجف دوم من أذكر اسمك
جتفت روحي جتاف كل ظني أنساك .... من روحي تطلع روح وتكولي أهواك
شما تبتعد هيهات تبعد عليه .... أتنفسك كل يوم يعني انته بيه
كونك تجيني بطيف وتمر عليه .... حتى الفراش يكوم ياخذ تحيه
ماناسي والعباس والناسي ماعاش.... حبك لكيته وياي نايم بالفراش
أتونس على شفاك لو حركتهن .... انسى شتريد تكول وأنسى الكلتهن
لاتظن غيرك يوم واحد عشكته .... ولو يوم احب اثنين هم انته وانته
طك كلبي والعباس كلش عليكم .... مو مشي يمكن راح دقلات أجيكم
دم مو دمع والله هلن عيوني.... من يوم أعز الناس من فاركوني
كون أنكلب قانون وأحكم حكم عام .... وأحكم على الينسوك كلهم بالاعدام
كون الفرح ينعاد وترجع اليه .... صدكني ياابن الناس انته الهديه
كافي ياروحي الم كافي ياكلبي جراح .... اذاني جرح الندم من ولفي عني راح
كون الله وأهل البيت وحيدر الكرار.... يرجع حبيب الروح وأكتبله اشعار
فك كلبي بيدك شوف دور أركانه .... امعشعشه جروحك بي مثل الحضانه
هالمره راح نشوف أغفر وأتاني .... محتاره صار سنين اني وزماني
ياروحي يادنياي ياحبي الأول.... بسك هجر وفراك البعد طول
كلولي منهو ذاك كلتلهم هواي.... شنهو العالمة البي؟ رف كلبي وجلاي
كل ساعة احسن بيك جنك نبض دم.... تسري انت بالشريان وبكلبي تلتم
مادام كلبي قفل هاك انته فتحه.... فتش بكل عضاي كل مسه وصبحه
نبته وغصن مكسور وبشحه الماي.... هذا انا كلبي عليك من تبعد هواي
ماعندي ذنب وياك وأستاهل تعوف.... شلتك برمش العين وبذني الجفوف
هاك الكلب والروح هاك اخذ العيون .... وأخذ العقل وياك خليني مجنون
هاليوم انه وياك بس أرمش أشتاك.... جا شنهو بيه يصير لو صار الفراك
يامسافر الله وياك بأسم الله محروس .... ياشفه بعد شفاك تستاهل البوس
يتشابهن بالضوك ملحك وملحي.... بس انه فوك الزاد وانته على جرحي
يسمر عليك العين تسألني كل يوم .... وتكولي أريد هواي لو أترك النوم
بس كافي أترجاك ارجع اليه .... مو شفت من فركاك كل الاذيه
متعلمة روحي عليك ماترضه تنساك .... أقبل أنا بالموت بس أبقى وياك
غالي وعزيز هواي وفراكاك هموم.... وعيوني لو تنساك أعميها للدوم
أسأل دموع العين دمعة على دمعة .... الرحل عن العين كلي شيرجعه
أنشد عليك الروح كل ما يجي الليل.... وينك يابعد الروح ماظل بعد حيل
ياراحة ياأفراح تلتم عليه.... غير القهر وأحزان هو اللي بيه
تدري الندى البشفاك لو لامس شفاي.... شهرين أظل بالصيف ماأشرب الماي
دوم التريده الروح مبتعد عني.... ليش الحبيب وياي مايفتهمني
لو تحسب النجمات وتعرف عددهن .... والله وعلي الكرار حبك بكدهن
فراكك حزن عاشوراء وشوفتك فرحة الزهرة .... أحبك ومااكذب عليك والكاذب الكاظم يسطره
2024-11-18, 9:51 am من طرف شروق محمد
