رجاء دخلو شباب اني محتاجلكم

مساء الخير شباب

صارلي هواية ممنزل موضوع لأن جنت ملتهي بهواية شغلات واعتقد انو هذا حيكون هو اهم موضوع كتبته الكم ، بس الي اريده انو تقرون الموضوع للنهاية رجاءا

القصة ومابيها انو اني صارتلي مشكلة، بصراحة اني حاليا دأعيش فد عيشة مستقرة الى درجة واعتقد انو هذا السبب الي خلاني افكر بشغلات يمكن راح تكولون عليها مال ناس بطرانة، بس اني لا دأكدر آكل ولا اقرة واشرب ولا انام، شغلتي معقدة وهي كالتالي:

جنت دائما اكول ماكو شي بالدنيا اسمه حب وانو هو مجرد قناعة انسان بأنسانة، واذا جانت اكو شغلات مشتركة ابيناتهم فهمة راح يتوافقون وراح يسموون هذا التوافق حب!!!

اني قبل فترة (بآخر أيام العطلة الصيفية (على كولة الجهال العطلة الجبيرة)) جنت احجي وية بنت عمي بالنت وجنت كولش اكرهها واحسها كذابة وهي تحسني مغرور ودائما جنا نتبادل هاي الالفاظ واكلها اني اشكد اكرها وهي هم (تعرفون بت عمي يعني نفس الكروموسومات) مجانت اتقصر وياية ابد، جان لسانها احد من السيف وكل ما اني ازيد هي تزيد وجنا نتزاعل ومرات اصلا ميعجبني اروح لبيت عمي من ورة جهرتها الزفرة، جنا كلنا (اني واختي واخواتها الثنين واخوتها الثنين) نلعب ونضحك ونندمج وهي منعزلة وكاعدة وحدها ابفد غرفة، هي انسانة منطوية على نفسها ووحشية ومو اجتماعية واني بعكسها تماما (وخلي انكول هاي بداية مشكلتي من ناحية)

ومن الناحية اللخ،،، اكو مشاكل بالعائلة عدنا بين امي وبين عمي (ابوها للمسعدة) وصارلها سنين وحاولنا هواية انو نحلها وماكو فائدة وهي فد خليط من مشاكل مالية وتعرفون العراقيين والفلوس بعد شيحلها؟ وبصراحة الغلط من امي وامي كولش متحب بيت عمي وحتى من انروحلهم منكوللها انو احنا رايحين يمهم ولحد هسة امي تعتقد انو احنا وبيت عمي متزاعلين من سنين، وامي انسانة صعبة (هاي عيد الام مصارله كم يوم وكاعد احجي عليها)، وطبعا ولد عمي ومرته بنظر ماما الهم نفس النظرة الي تنظرها لعمي…

نرجع الى القصة الاولى،،، مرة جنت دأنتظر خالي الي بمصر يجي يحجي وياية على النت بس هو تأخر،،، وما ادري اني اشجابني ورحت على بت عمي وكتبتلها اني هسة دأنتظر احد تحجين وياية لحد ما يجي؟ وهي قبلت وخلال الحجي دزتلي السمايل ابو البوسة!!! اني رأسا اتخربطت كلتلها هذا شنو؟؟؟ كالت سوري والعفو مو الوجوه مدتتحرك عندي ومدأعرف وضلت تعتذر وتحلف انو هي مو قصدها اتدزه واني صدكـَتها لأن هي اشكد حابتني حتى اتدزلي بوسة وكلتلها مومشكلة مصار شي وهذا هو، بس هي ضلت تعتذر الى ان كالت بعد ماعندي جرءة احجي وياك وراحت ومكامت اتجاوبني،،، وضلت حوالي اسبوعين كل متشوفني كاعد (فاتح نت) متحجي وياية في حين قبل جانت اول متشوفني كاعد تجي علية،،، فاني كلت ياولد خطية اخاف بعدها متضايقة،،، فكلتلها انتي زعلانة؟؟ وكالت لا، انت الي زعلان، كلتلها اني مزعلان والله، فهي كامت تحجي وتكول اني مو من هلنوع واني مو هيجي ومدأكدر اصدك اني اشسويت، وبصراحة اني جنت امصدكـَها لأن فعلا هي مو مال هيجي سوالف ابد، وضلت تحجي على نفسها وهي كل متكول اني فلان شي وفلان شي اكلها واني هيجي واني هيجي وصار فد حوار حلو وهاي جانت اول مرة اتونس وياها مثل ما اتونس وية اخوتها واخواتها،،، وحبيت اكرر هاي المحاورة الحلوة مرة لخ وكررتها مرات ومرات ومرات، الى اني اكتشفت فد انسانة حلوة ورقيقة ومؤدبة وحساسة وعدها نظرة للحياة مشايفها يم اي احد وبمرور الوقت مكمت احس روحي راح اكدر اعيش بدون نقاشاتنا الحلوة،،، ومرة ورة مبدة الدوام دزيتلها مسج وكـَلتلها اريد نحجي علنت، بس وراها اعتذرت منها وكلتلها مراح اكدر لأن باجر عندي امتحان وملحكـَت اخلص،،، وهي رأسا كالتلي لعد انت عندك امتحان وتريد تفتح نت؟ اكعد اقرة واذا تريد تحجي فخليها على باجر،،، وثاني يوم من طلعت من الامتحان (طبعا اكيد مجاوبت زين شي عادي) شفت جاييني مسج (ليوثي امتحنت لو بعد؟؟ عود من تمتحن كولي شلون جاوبت لأن البارحة اختي كالت انو عندك امتحان) طبعا هذا المسج اجاني من ابن عمي (اخوها) وجاوبته، ومن رجعت للبيت اجاني مسج (ها بشر خيو شلون جاوبت؟؟ ياربي زين) وجان منها وجاوبتها، واني هم حبيت اسألها على امتحاناتها وجنت دائما اتطمن عليها، واتفقنا انو انكون اخوة على الحلوة وعلى المُرة وطلبت منها انو بعد من نجي يمهم تكعد ويانا ومتروح بالغرفة لو بالمطبخ وحدها، ومن رحت يمهم شهدت الكل انو هي وعدتني انو راح تبقى يمنا وتلعب ويانا والكل شجعوني حتى انطلعها من هلجو الي هي دائما حابسة نفسها بي (عيني بتنا وانخاف ليروح يصير بيها توّحد) واني من شفتها ابيتهم ومن جنت اتقرب عليها جنت احس بفد احساس غريب ما ادري شنوة، جنت احسها حلوة كولش رغم انو قبل جانو يكولولي انو هي حلوة واني جنت ابقى صافن عليهم (هلكد مجنت اكرهها مجنت حتى املاحظ انو شكلها لطيف)، وجانت من تضحك احس ضحكتها تضل ترن بأذني حتى من ارجع للبيت ابقى اسمعها، مكـَمت اكدر اعيش ساعة اذا متجي على بالي، وطبعا اتكررت روحاتنا يمهم وجنت كل يوم اتعلق بيها اكثر واكثر، لحد ما فد يوم خابرني اخوها ديبجي وكـَالي: ليث الحكـَ ابوية راح من ايدينا!!!!!!! اني رأسا افتهمت انو عمي اتوفى (هذا الحجي قبل شهرين تقريبا) وورة الفاتحة جنت اروحلهم دائما وتقريبا كل يوم وابقى لليل اني وبابا يمهم وطبعا بدون منخلي امي اصلا تحس انو عمي اتوفى وعلى اساس اني وبابا دنروح يم صديق بابا الي على اساس انو هو مريض وماعنده احد يداريه، وحتى اختي مراحت للفاتحة مال عمي، المهم، اني كولش صرت قريب منهم، وهي جانت من تضوج اتدزلي مسجات واحاول دائما انو اكون قريب من عدها.....

عيني ما اطولها عليكم،،، اني دأحبها ،،، خلص بعد مدأكـَدر اعيش بلياها،،، حتى لمن تسولفلي فد سالفة اتصير وياها بالكلية وانو كـَالت لفد ولد هيجي وهو كـَاللها هيجي كمت احس روحي افووووووووور، اغدي نار من الغيرة،،، عقلي مديشيلها انو اكو واحد ديحجي وياها غيري،

مشكلتي انو اني هسة دأحس روحي راح اموت اذا بقيت مشاعري جواية،،، واني ما اكدر اعوفها وبنفس الوقت اني ما اكـَدر اذا اكبر اتزوجها لأن المشكلة الي بين عمي وامي بعدها قائمة وجمالة عمي اتوفى والمسألة صار حلها فد شي فوق المستحيل، واني ما اكدر اكـَلها اي شي لأن اذا راح اكلها، فهذا يعني انو اني واحد قليل شرف (اكو واحد يروح على بت عمه (شرفه وعرضه) ويكوللها اني احبج بس مااكدر اتزوجج) شلون؟؟ شأسوي؟؟؟ اني متضايق ،،، اريد العالم كله يسمع انو اني احبها وهي اول الناس، بس ما اكدر، الطريق كدامنا مسدود،،، ومرات اكول انو امي ( لا سامح الله بعد عمر طويل) مدايمتلي، بس مع ذلك اني اكره نفسي بمجرد ان احس انو اني دأبني زواجي ومستقبلي على وفاة امي ( الانسانة الي تعبت علية والي ربتني والي مقصرت وياية لو حتى بدمها) هذا مو حجي... واني ممستعد انو اتخلى عن امي لو اجتي كاليوباترا خطبتني من ابوية،،، اذا امي متقبل فآني مراح اقبل...

عموما،،،

واني اسف اذا جنت امعودكم على مشاركاتي التحشوشية بس جديات الدنيا ضاكـَت بعيني وما ادري شأسوي؟؟

والله يا اخويه ماعرف شكولك داقره بالسالفه ومستغربه
هي قصه كلش حلوه وتصير هوايه... والمشاكل متخلص
واعتقد لازم تكوللها وهي اكيد رح تقدر هل شي لانه تعرف
بمشكلتك...وحاول تحل المشكله ويه امك وخلي بنت عمك
تحس انه انته دتسوي الي تكدر عليه حتى ترتبط بيهه...
تواجهون المشكله سوه احسن من ماتتعذب انته لوحدك
شوفها اذا تبادلك نفس الشعور حتى تعرف تتصرف
يعني كوللها انك تحبها وارتباطكم انشاء الله مو مستحيل
لانه ماكو شي يصعب على رب العالمين...واتمنالكم
التوفيق اخويه ويارب تنحل مشكلتك وترتبطون وتعيشون
بأمان وبدون مشاكل ... تقبل مروري ونصيحتي اخي العزيز

هاي شنو ليوثي حالتك حالة
الله يوفقك انشالله واني اكول اعترفلهة مادام تحبهة واني متأكدة هي هم تحبك
وبالنسبة لوالدتك انت احجي وياهة وكوللهة انو انت تحب البنية وانشالله تتفهم الي بقلبك
تقبل مروري

:333:

حبيبــــــــــــي الغالـــــــــي ليوثــــــي وربــــــــــي مشتاقلـــــــــك
واللــــــه ما اعـــــرف شكول بس انت مو كلت عمك اتوفى (الله يرحمه ) فما اضن اكو مشكله يعني امك ويامن حتتارك اذا المشكله جانت ويه عمك وعمك راح ليش تستمر المشكله وانتوا ليش ماكلتوا لامك ان عمك توفى ؟؟؟
لك هاي السالفه مو غريبه عليه ..... المهم انت اذا تعرف ان انت متكدر تتزوج البنيه دير بالك تصارحها وتحسسها انو انت تحبهــا تره البنيه حتنعلس (تموت من القهر) ...
حبيبي ليوثي تره ماكو مشكله بالدنيا ماكو الله حــل ...
انت حاولت تحجي ويه امك ؟؟ ليش محاولت ؟؟ وتره هسه انت بعدك صغير عالزواج
وكدامك فتره هاي الفتره لازم تحاول تقنع بيهه امك ....(مو تروح تكمز عليه تكله يووووووم احب بنت عمي وحتزوجهه لو تنكلب الدنيا ..تره تحطك وتكتلك ) لازم شويه شويه تعرفهه بطباعمه وتحاول تحببه بيهم وتقربهه منهم لك انت لسانك طويل وحشاش يعني المفروض هاي الشغله مو صعبه عليك .... اكلك شغله دير بالك تعاند امك او تقهرها تره تخسر خساره جبيره ..... اني ما اعرف شكد الحزازه بين امك وبيت عمك ...بس اذا انت تشوف الجواز والارتباط بيهه مستحيـــل ... ما اريد اكلك هيج بس حاول تخفف علاقتك ببنت عمك الى ان تصير حالها مثل حال خوالها مرد بنت عمك ولو اعرف هذا شي كلش صعب
بس لازم تستمر الحياة ....

هم حفكـــر شويــه وارجعلك خبر اذا لكيت حـــــل ....

بس تدري تعجبت من قريت الموضوع ..جنت خابصني اكره البنات وماكو شي اسمه حب
اتطورت عمي من عفتنا هع .....
يله بــــــاي

روك

مو اني هم خايف من هاي الشغلة،،، اخاف هي متحبني،،، بس من اشوف اهتمامها اكول لا اكيد تحبني،،، مع ذلك اني لازم انتظر لأن عمرنا مو مال زواج وبعد وكت بس ادعولي،،، ومشكورة جزيل الشكر خيتو

فروحة
انتي وردة مال الله بس اني ماريد احجي وياها بالموضوع ،،،، ما ادري ليش،،، والله خايف،،، مجنت اخاف من كولشي،،، متصورت راح يجي يوم ارجف كـَبال بنوتة

مسطووووووووووووول صديقي
الحزازية بين بيت عمي وماما توصل لدرجة انو احنا مكـَلنا لأمي لأن راح يوصل الموضوع للشماتة،،، واني اذا شفت احد ديشمت ابيت عمي حتى لو امي راح اطكـَ من قهري وبوكتها مراح اكدر الزم نفسي ومع ذلك اني مستحيل اضحي بأمي علمود اي بنية
شفت شلون عبالي كلها كلاوات وماكو حب وحبانية وتالي اني الي وكـَعت بيها اهئ اهئ اهئ
واعتقد انت حجيت صح لازم اخفف علاقتي وما أأذي بنت عمي واحاول انساها

مشكووووووووووووورين كلكم على الردود
متعرفون اشكد خففتو علية

يابـــــه اذا بهيــج وكت ما وكفنـــا وياك لــعد شنو فايده الحبي والاغاتـــي

يعنـــي دا افتهم منــك ماكو امل امك ترضى ببنت عمك مو ؟

لذلك حبي مثل ما كلتك ...(زي ما دخلنا بالمعرف نخرج بالمعروف )

ونرجع تيتي تيتي مثل ما رحتي مثل ما اجيتي ....... وربــي قلش ضجت وانقهرت عليك لين هذا شي ابد مو سهــل ...

بس ماكو شي يمنع المحاوله ويه امك مو صحيح ... حتى اذا انكتلت تكبر وتنسى ...

يلـــــه حب اريدك ترجع مثــل ليوثـــي القديم قـوي وتضحــك مو تبجــي
:امواااااااح:

اي ماكو امل انو ترضى بيها

بس اني عندي وقت هواية الى ان اكون قادر على شغلة الزواج
بس مراح ابقى انتظر واعذب نفسي طول هاي السنين الجاية
وتحت شعار ربك اذا خلق احد ميكسر القالب وراه
راح احاول انساها
بس خلص هاي اول مرة واخير مرة اتقرب من بنية وبعد ماريد اتعب نفسي بهيجي شغلات
صارلي اشكد مضاحك من كل كـَلبي،،، راح ابقى بالمنتدى بلكت انتعش انكفش افرفش

:خطيه تحب: ولك تسلملي تسلمي اشكد ارتاحيت من حجيت وياك:خطيه تحب:

:يبوووو:

ليوثـــــــي انا بالخدمــــــه

ههههه هسه يكول جلب كل شويه يكمز يذب حجايتين ويطلع ههههههه
:نياااا:
عد مو تحمضهه متحجي ويه بنات:تعال لك: تره اذا سويت هيج حتصير معقد وخصوصا انت طالع من تجربه فاشله فلذلك صير كوووووول واعتبر هذا الشي مصار واكيد حتلكى الاحلى منها بس مو كبل تحبه اتأكد بالبدايه اكو مشاكل لو لا خههههههههه

لا ولك لتحجي هيجي اني يحبك مثل ما الأنت يحب الآني

بالعكس والله اشكد افرح من اشوفك راد علية،،، مو عايفني احجي وية روحي
ومراح احجي وية البنات لو تنكـَلب الدنيا واذا احجي وياهم بس راح اتعارك
وكل يوم الصبح راح اغني النشيد الوطني مال الشاب المخلص للشباب جذابات جذابات

ليوثي بالنسبة للبنية ف اني متأكدة تحبك مادام انت تحبهة اكيد هي حاسة ومادام تسأل عليك ف اكيد تحبك وبالنسبة للوالدة لتخاف خليهة على الله ولتضيع الوكت اقرب وكت تتشجع بيه روح كلهة للوالدة

فروحة

انت هسة تقبلين احد يجي يكلج اني احبج بس مراح اكدر اتزوجج،،، شنو اول شي ممكن انو يجي على بالج؟؟ حتتصورين انو هو ناصب عليج،،، واني افضل انو متعرف انو اني احبها ولا تعتقد انو اني دألعب عليها،،، وحتى لو تحبني اني ماريد أأذيها، اني احبها فروحة احبها من كل عقلي،،، بس راح احاول وية امي احسن شي

لك ليوثي اخويه الورده تحب واني ماادري
وك والله فرحتلك
ديربالك عليها ولتخسرها لاي سبب
اني اقترح تحجي ويا ابوك وابوك يعرف يقنع امك
والبنيه اذا حبابه وذكيه راح تعرف تخلي امك تحبها
وعمك الله يرحمه مات وبعد ماكو داعي امك تشيل حقد على شخص ميت لان حتى حرام
وبالنسبه للبنيه افضل متصارحها لان لازم تظمن اولا اهلك وتظمن انه تكدر تخطبها
اذا تكللها بس راح تعذبها بدون فائده لان هيه متكدر تساعدك بشي
مثل متعرف البنات عدنا لايقدمن ولاياخرن بهيج مواضيع
ومبرووووووووووووووووووووووووووك مقدما
من تتخرج وتنخطبون مو تنسى تعزمني على العرس اني وكل الاعضاء

هلو حبيبي ليوث شلونك صدك مشتاقين شنو هل القصة الكاتبها فعلا تقهر بس شوية تضحك لان انت كاتبها

اول شيء الله يرحمه لعمك ويجعك مثواه الجنه

ليوث يمعود لا تدير بال لو هية من قسمتك راح تاخذها لو كل العالم يعارض هذا الزواج

لان الزواج بالاول والاخير قسمة ونصيب

لاتخاف خلي املك بالله واطلب دائما من الله يجمعكم بالحلال سوا والله كريم

وشوف اكلك شيء الام لو شكد تكون قاسية بالاخير الا تريد سعادة ابنها

يعني اذا انت راح تنسعد ويا هاي البنية ما اهتقد امك راح تعارض وبعدين
البنت بريئة هية شعليها من مشاكل امك وانا برايي احسن شيء تسويه
تروح على اقرب انسانة من امك خالتك مثلا جيراتنكم يعني
وحدة تقدر تتفاهم ويا امك وامك تحبها وتثق بيها اهم شيء وتحجيلها السالفة كلها
مثل ما حجيتها بالموضوع وتخليها تساعدك وتدخل بالموضوع
وانا راح ادعيلك بصلاتي امك توافق وترضى حتى تصارح بنت عمك الله يستر عليها بالزواج
وياريت لو كنت اساعدك اكثر ليوثي حبيبي
وانشاء الله ما يصير الا اللي يسعدك انت وبنت عمك وامك العائلة

تحياتي الك ياورد

فينوس

يا خية خلي هسة اعرس وعود اعزم المنتدى والمنتديات كولها حتى الـ كـَوكـَل هم اجيبه
وانت حجيتي صح ما لازم احجي وياها بأي شي،،، واني لو جان بأيدي مو بس ادير بالي عليها، اشيها بعيوني وانيمها على رموشي واكـَابلها واكعد بس شسوي،،، وماادري شلون اشكرج على المرور الحلو

سيوووووووووووووووووووووووفي
هسة كملت الردود بردك الحلو
اخ اشكد مشتاقلك ومحتاجلك
ووالله اقتراحك حلو،،، هاي احسن فكرة،،، شلون مجتي على بالي،،، بس تبقى شغلة،، اخاف اتكوللها والنوبة يحترك فلمنا اني وابوية لأن دنروحلهم من وراها،،، بس اعتقد الموضوع يستحق المجازفة،،، اتناقش وية الوالد والله كريم،،، وشكرن على دعواتك وعلى مشاعرك،،، جنت محتاجلهم هواية

صح ليوثي انت هم حقك اكيد هي محتصدك اذا كتلهة احبج وماكدر اتزوجج بس حاول تحجي وية والدتك وقنعهة واذا مفادت السالفة احبس روحك يومين بالغرفة هههههههه هاي مو نصائحك؟
وانشالله الله يوفقك يارب بس موتنسة تعزمني بالخطوبة؟ ترة ازعل

هلو خيو ليث

ان شاء الله بخير

شو أني قريت القصه وكلش أتاثرت بيه

بس هي المشكله بين أمك وعمك

البنيه شنو ذنبها قابل ؟

حاول تكون جريء وتقنع امك

واكيد اذا ما اقتنعت من اول اذا شافت تلح عليهها راح تزهك وتقبل بيها

بس يعني هاي الشغله يحتاجله خلك وصبر

وبعدين أنته هسه كلش صغيره مو مال زوااج
يعني غير المفروض تتخرج وتكون نفسك يله

ولا تشيل هم مدام انته تحبها اتوكل على الله

وماكو اي مشكله اذا ما الها حل

وأي شي تحتاج أني موجوده بخدمتك واعتبرني مثل اختك الصغيره
تحياتي ألك

فروحة

يايابة شلون ذكرتيني بسالفة الغرفة جنت ناسيها
اني اموت على هاي الحلول الجذرية خخخخخخخخخخخخ
وبس اخطب اعزمج على الخطوبة والمهر والحنة والعرس والسبعة والاربعين والسنة (اشو كلبت فاتحة مو عرس) بس خلي اخطب وربج كريم،،، منورة

ميناااااااااا
ادري اني كولش صغير
بس اني ما اريد احلم فد حلم ادري نهايته مسدودة،،، اريد من احلم اكون متأكد انو اذا تعبت وضحيت راح اكدر احققه مو اتخلى عن امي يلا احققه،،، وصدكـيني امي قافلة وتعرفين العجايز خليني مؤدب وساكت يا خية
وطبعا اذا احتاج شي راح اجي عليكم لأن ماكو غيركم يدري بالسالفة،،، فرحتيني بردج منمن

الله يساعدك ويسهلك امورك
يمعود خليهة على الله لان لكل مشكلة حل وانشاء الله تنحل مشكلتك بسرعة
ليث الحب عذاب اذا اتحبهة اتحمل
وامك اكيد اهم شي بالدنيا بس انتو غلطانين انو ظامين عليهة علاقتكم ببيت عمك هذا رح يصعب الموضوع لان لو تعرف من زمان علاقتكم ببيت عمك جان اقتنعت بمرور الزمن
تقبل رايي

بلاك بيرل

هذا الموضوع مراجع بس الي راجع لبابا ولأخواتي وهمة مموافقين انو انكوللها،،، يمكن انت دتحجين هيجي لأن متعرفين المشكلة شنو نوعها،،، بس اني راح اسوي محاولة اخيرة بعد فترة واذا فشلت هاهية راح اعوف الشغلة شسوي
ويسلمووووووووووو على المرور

السلام عليكم

اخوية ليث .. الله يريحك .. كلنا وياك

اول شي سؤال:هية نفسهة البنت الي تحسها امك ومرات تحسها بنتك؟؟

بصراحة مشكلتك معقدة حيل حتة صعب الواحد يرد عليها

بس ما شالله الشباب مقصرو

اذا يهمك رأيي البنت ابد لاتكوللها انو تحبهة .. خليك مثل ما انتة ..

اما امك ادري الشغلة صعبة والله من يمي ارجف .. بس انتة ما عندك غير حل ..علة الاقل اكو نسبة ولو صغيرة انو والدتك تحن عليك ..واالله كريم..

بصراحة اذا ما قبلت ..لا تعوف السالفه .. اتوقع اذا كلتلها انو انتة لو هاي البنت لو متتزوج(مو بعصبية بطريقة مال ناس بريئين)

وتحسسها انك جدااا حزين وهية السبب بتعاستك .. اتوقع ان هذا من حقك

حاول تتلوكلها لامك كوللهها اني ما اتزوج اذا انتي مترضين عليها ..

اني ما مقهورة غير عالبنية ..الله يساعدهة شنو ذنبها؟؟وانتة هم والله

ماتستاهل ..بس هاي الدنيا ..الطيبين يروحون بيهة ..

خليك علة رأيك اهم شي امك .. لان هذا امتحان من الله واذا نجحت بي اكيد راح يعوضك ويريحك

الله كريم..ترة الي يششوف مصايب الناس تهون عليه مصيبتة ..

ودير بالك تحجي عالبنات ها ..ترة نشوفك العين الحمرة ترة البنات يسووك واولهن المحروسة بنت عمك ..اكعد عاقل بلا وكاحة ترة اوديك للبيت اليخووف البي وحوووش ههههههههه

العراقية الخضراء

هههههههههههههههههههههههههههههههههههههههههاي
لا حبابة اني اخاف من الوحوش بس اذا انتي ولابسة جرجف ابيض وامطفية الضوة فمو مشكلة

اي نفسها البنوتة الي دأحسها امي من تحن علية والي احسها بنتي من تشكيلي وتريد مساعدتي
واحسها اختي هلكد ما اغاااااااااااااااااااااااااااااااااااااااار عليها

وكلامج كله منطقي وحلو وروعة ويدخل الكلب بسرعة، واعتقد امي هي الي لازم تستسلم لأن مدأكدر اشيل الفكرة من راسي بعد جلبت واني من اجلب بعد شيشلعني!!

ليش مقهورة على بنت عمي؟؟؟ اني دأسوي المستحيل وضاغط على نفسي وامدمرها في سبيل ما اذيها ولا اجرحها،،، انقهري علية اني المسكين poor layth

وترة اني ما احجي على البنات ،،، لا لا لا ابد،،، بس دائما قبل ما انام اغني النشيد الوطني مالتي،،، جذابات جذابات،،،، خخخخخخخخخخ

والله نورتي الموضوع

ههههههههههههههههههههههههههههه
عشت

لالا البس جرجف اسود والضوة ابيض ..هههههههه حتة تخاف

اهوووووووووو اعرفك من تجلب مغناطيس ..الله يهدي كل الامهات ياربي

هاي شنو بسلا بعدين انشالله اذا صار النصيب راح تحملها منية حبك..محد كالك تحبهة وتكتل نفسك عليها ههههههههههههههههه.. مو كلنالك انقهرنة عليك شنو كوووة

اصلا اصلا حبابات حبابات

لوما تغار ماتحجي هيج ههههههههههههههه

منور بيك

طبعا انته مبين فد شيطان حيل والكاتب هذا الكلام والحجي معناها يعرف يتصرف ويعرف يفكر زين بس تعرف انته شتسوي اذا عقلك جبير تكعد تحجي ويا امك وتفهمها وتكوللها اني احب بت عمي ومابيها شي الام الي تحب الخير لابنها تتمناله السعاده من كل قلبها وتضحي بعدين عمك ومات الله يرحمه وحرام الحقد يظل احنا امة مسلمين وعفا الله عما سلف ومادام ابوك يروحلهم يعني انته كاسب طرف وهسه اكيد ابوك يوكف بصفك وانشالله الله الكاتبه ايصيروكل الخير انشالله

هلوووو شلونكم ؟مشتاااافتلكم صار هواية مداخلة

اول شي اخوية الغالي موضوعك حلو ومشكلتك اصعب
اني برأيي اكول اوووول شي خلي املك بأللة كبير لان ماكو شي مستحيل على ربك
وثاني شي والاهم لازم تصارحها بالموضوع حتى توكفون اثنينكم بوجه كلشي لان ممعقولة انت تعاند اهلك وتحاول يخلوهم يوافقون وبعدين هي اللي ترفض وهيج تخسر اهلك وتخسرها فتأكد منها بألاول
وعلى امك اكيييد يجي يوم وتتصافى القلوب ماكو شي يبقى على حالة وثاني شي انت رجال والكلمة كلمتك والقرار قرارك عزيزي
يارب يوكف وياك وييسرلك يااااارب
شكررررراااااا

وعلى فكرة نسيت اكلك لو مقسومتلك تصيرلك لو جانت بالمريخ ولو جانو اهلك والدنيا واكفين ضدك تصيرلك ما دام ربك كاتبها

واذا مامقسومة لا سامح الله متصيرلك لو تنطبق السما على االارض ولو جانو اهلك موافقين وجانت يمك 24 ساعة متصير
والخيرة في ما اختاره الله

» رجاء اوقفي البكاء
» اخوان خوات ممكن تدخلون واشوف طلبي رجاء
» شباب وبنات مهم للنقاش
» دارميات عراقية جديدة دخلو شوفوهاا
» بسرعة رأيــ(ركــــــــض)ـــكم شباب