حيرتني بيوم سالوفة عشك
بس عشك من نوع ثاني
وردة مزروعة بحديقة .. بود تعاني
من البعد رسمتلي لوحة من الغزل
وحركت بيه تعابير الحنين
وغمرت جروفي الشحيحة لفح ماي
ودكدكت بيبان سدتها السنين
انمدت ايدي بلا شعور
وحظنت طيوف الندى الغافي بجفنها
شدني لون
باكني مشهد غريب
كاع تتشبك بظل جذورهه وترسم املها
ويا املها الينتظر موسم ربيع
ويا املها الينتظر سله التبيع
الامل باكه الهوه الي يهز خصرهه
عفية وردة ما تعبتي من الغرام
عفية روح شكد تجوت بالملام
ناس غمرتهه بحنين وية الشفايف
وناس باعتهه برخص وية الكلام
وايد زرعتها وعيون اتنطرت
اوسفة نفس الايد خانت وكطعت
كلت خليني ادك بيبانهه
بلكي تسمحلي افوت
وبلكي اطشر روحي بين اعتابهه
وانتحر بدروب حبهه لو بدر من عدهه صوت
وللاسف ما جاني صوت
للاسف ما شفت بس دمعة تناشك
جرحت خد السوالف بالسكوت
اخرست اشفاف الحجي وضاع الكلام
انباك حتى الحلم من باب المنام
ما حجت بس صورة رسمت
ناشدت بيهه الرحيل
بقلمـــــــــي
2024-11-18, 9:51 am من طرف شروق محمد
