زماني جرد اسيوفـــــــه و سنه
عليه او حرمـــــــت عيني وسنه
وحق اللي فرض خمسه وسنه
بعد هيهات عيش ايصير اليه
ابـــــــــد ما زلزلك حالي وهدك
عفاه اشيحمل الكلفـــه وهدك
قصدي بــــــس اصيدك وهدك
واريد اتصير حر وترد اليه
مره اصفن عليكم مـرة سايل
مرة الدمع ناشف مـرة سايل
مرة احتار شكتب من رسايل
مرة انتظر ساعات المنيه
اتلعثم من اشوفـــــن وسطك انا
اومنو الوشوش بذانك واسطك انا
تكلي وينك انتـــــــــه وسطك انا
تدور بالنبض تعثر عليه
اشنون الروح اكضها مـن تهم بيك
او مثل تهمه حبيبي من تهم بيك
الضيم اليمر بيا منتـــــه تهم بيك
ولا جنك وانا مبين عليه
اجزعت من صبر روحي ملت
اهموم احصدت بالدنيا وملت
بنيران الفضا اتجـــوت وملت
الجزع صاحت من الهم والاذيه
قسيت وياك يسمـــــر عمي انا
وعين الي الماتشوفك عمي انا
اذا خالك فـــــــــزعلك عمي انا
تبره وضحك والوادم عليه
شلون شاة ويـــــه الذيب يربه
وصديجك لــــــو توده دوم يربه
اليتيم العد شريجه شلون يربه
تسطره ولا تكول عليه خطيه
انه اتعلمت عالخــــــدر روحي
وروحي ويــن ماتريدين روحي
اذا طاب الج هذا جسد روحي
وبعد ما تلكين شي يرهم عليه
كل مغرم برت علتــــــــــه وناله
سعيد اللي حضه بشخصك ناله
الطارش من سمع نوحي و ناله
ترك شغله وبجه رحمه عليه
روحي والهـــــــوى ودنياي وعداي
علي واشلون اشيل الجدم وعداي
صابر وانتظر واشـــــــــوف وعداي
ايفرح لو دوم وكتي محيط بيه
نديم الروح يامــــــــــدلل صبلها
حنينه وشافـــــت بعينك صبلها
مقامات العشك حبـــــك صبلها
بقيثارة عواطف سومريه
بكاس العمر ما ظلــــــت وشل بيك
وبجروحي لشوكت تنزف وشل بيك
تكلي ليش متمرمـــــــر وشل بيك
تهت منهو اليدليني عليه
الصديق اللي اتشوفه نقي ونظيف
تود كل يوم نبدي اعليـــــه ونضيف
على طيبه نجمل طيــــب و نضيف
بكثر معنى الحروف الابجديه
وانكطع حتى النفس والنفس ظل مكطوع
وتاليتي مثل الغصن مـــن الشجر مكطوع
خلفه هوه صار الزمن وانطوى اله مكطوع
لاصيه خله السكف لا هوه خله يسر
بيك الطيــــــب والزينات وفرات
يمن مايك عـذب يالزمن وفرات
دجلتك وانته خويه صرت فرات
وبكرمة علي نصبح سويه
ولك كلي تلين اشوكـت و تحن
وانا الوصلك ادور الفرص واتحن
ولك انت تخصب جفـوف وتحن
وانا بدمعي احني جفوف اديه
روى الزيتون من دمعي ولا راك
وغيرك مانحـل جسمي ولا راك
اخاف اطــــــول غيبتكم ولا راك
وعند وصلك تدانيني المنيه
تعب كركي براس جبال ملوه
وكلبي بجومه الحـــداد ملوه
وصديج الكثــــر الجيات ملوه
الاحسن كل عشر تيام جيه
حبك من شفاف قلــــب عتباي
ولا نوبه اذكرتناو اوصلت عتباي
اعتب ما نفــــــــع وياك عتباي
على ياهي ازعلت واقطعت بيه
يمن هجرك بلب احشاي وسم
يخايب ليش بيـــــه تبيع وتسم
اخير الروح بين الخنـــك والسم
السم والخنك راتهن سويه
احبك ما احب عل الارض سواك
سبحان الذي مــن طين سواك
بشر لاكنه وي الكمـــــر سواك
واحد فوك واحد بين اديه
الندم ما ينفع بوشـرك ولا ساف
ولساني ما غلط مثلك ولا ساف
تظن عالي واشوفنك ولا ساف
اقل من اثر شافت اعله الوطيه
فاتحتمن بعسر غير المصايب فتحتمن
وسهم غـــــــدرك ابكلبي فات حتمن
اكتلتني وجاي تســــــــــأل فاتحتمن
ولا جنك رحت جناز بيه
العنب مـن كال عالي ما طليته
والزمن ما خفت منـه ما طليته
وجهي نفسه وجهي ما طليته
ولبست الجينكو لليمر بيه
يصاحب هالوكت النـه ولادار
ولا كاع البعد تجمعنـه ولادار
لا وكت الذهب مرنه ولا الدار
كضينه ايامنه ابهم واذيه
تكلي بعد ما اريدك ولا ابيك
هاي اطباع مو منك ولا بيك
ابد ما الـــوم والتك ولا ابيك
الوم الوكت الرهاك عليه
منو مثلي عليـــــه دارو خوانه
والدنيا اطلعت بس ويااه خوانه
اخذ خاوه الزمن منــــه خوانه
وخله الاخ ولا يعرف اخيه
يدنيه شبيج حصـــره دوم نفسي
وعلى الطيبين دوم اتلوب نفسي
اجر حسره ونزل ما صعـد نفسي
واذا يصعد حرك هدم عليه
الــــه اسنين الفرح وياي مايه
ومو واحد جروح القلــــب مايه
اليغص ابلقمه اذا ينطوه مايه
انه بلماي اغص وشلون بيه
دوم انشد عليـــك الراح والرد
الوفه منك نبــع والطيب ورد
ردت منك جواب الهاي والرد
انتضر الردود
2024-11-03, 12:31 pm من طرف شروق محمد
