اعجز عن التعبير عن العنوان

دمع الــــعين يمك انه اصبه
وذا ضــلعك تكسر انه اصبه
هاي اشــبيك قابل انه صبه
چواچيكك تدگ صبح ومسيه
.....................................
حبيبي من اشــــوفه ايدير وجهه
احس نيران وسط احشاي وجهه
كلامك بالــــــــــعتب وياي وجهه
حته اعرف كــــــلامك يعني اليه؟
...........................................
احبك غير حبك لايلفني
وعسه الموزين منك لايلفني
دلف شعرك حبيبي لايلفني
النهار ايصير خايف ليل اليه
......................................
حبيبي گام يتحاجه ويه غيري
دغيري يا بقايا الـــــروح غيري
گلت للروح يكفي عـــاد غيري
تدري اجاوبتني ابهل مسيه؟

كالتلي احبه ومـــــــــا اغيره
ولا فد يوم احب انسان غيره
اذا عل غيره هوه مليان غيره
يغار اعليك بالخمسين مـــيه
......................................
الدرب العشگ غيري من سحبكم
وعطشت وماي ماكو من سحبكم
رغم كل هذا لكن منسه حــــبكم
لان حــــــــــــبكم حياة وموت اليه
.............................................
وحگ من نزل القران نـــــصه
گلبي ابخيل هجرك صار نصه
اليــــجب لو ذاب لليهواه نصه
حــــــگه ايقدم الباقي هديه
.....................................
گلبي احترگ من هجرك والاعشاب
ونــــــــــه المتولع ابحبك ولع شاب
دوة الــــــــدكتور ما ينفع والاعشاب
اطـــــــــــــيب ابطبت اجدامك عليه
..............................................
ذبــــــت وبنار هجرك مايع اني
ويـــــعاني الگلب منك مايعاني
لون تطلب اهديلك ماي عيني
الــــــــك والروح اقدمهن هديه
........................................
يمن صفنت جن الكون وانسه
ويــــامن شوفتك للروح ونسه
اعوفك وك تريد اشلون وانسه
وانـــته اعله الكلب مطبوع بيه
........................................
وحگ من نـزل الكوثر والايات
راحت روحي بوداعك ولا يات
فاضت دول بـدموعي اولايات
اوافيض الكون اذا متمر عليه
......................................
أســــأل روحي بوداعك عسلها
وبدونك ريت كل عله عسه الهه
النحل من شفتك تاخذ عسلها
اكـــــــيد امربي بشفافك خليه
.........................................
اخذت اگليبي ماضل بس مكانه
وانــــته اشفاه اليه وبسمك انه
عفت الاذان واصرخ بسمك انــه
واصيح الله واكبر حن عــــــــليه
.........................................
الك لونين لعيونك ولك ضــــل
احس چنك تناديني ولك ضـل
تاه الگلب بدروبك ولك ضـــــل
طفل حيران يمشي ابلا هويه
.......................................
بيئة ورد جوري وياس بــــــــيتك
اشكثر شايل حلاوة انهجم بيتك
ما تدري ابدليلي ضــــال بي تك
وگطعته ابصدت اعــــــيونك عليه
...........................................
قسيت اوياك يسمر عمي انه
والـــعين الما تشوفك عميانه
اذا خـــــالك فزعلك عمي انه
تــــــــبره وظحك الوادم عليه

مو ذاك حـــــبيبك خالي انه
وگلبي من الزعل خالي انه
اذا عـــمك فزعلك خالي انه
فزعلي وما ورج العدوان بيه
......................................
گـــــــــــلبي انفتح بابه ولك طب
ولــــــك وصفه ابدليلي والك طب
لــك ما طحت انه ابهيده ولك طب
اتــشضه وراح جسمي ابين اديه
.............................................

***الحساس***

عاشت ايدك حبي

رووووووووووووووووووووووعة
يسلمو

شكرا صديقي الورده وصح لسانك